Erabiltzen ez den hizkuntzak ezer gutxi balio du. Ondotxo dakigu hori euskaldunok. Ezagutza ez ezik, erabilera ere ezinbestekoa da hizkuntza ororen normalizazioa lortzeko. Haatik, euskaraz osoki bizi ahal izateko, oraindik ere gutxi landutako esparru asko daude, tartean, merkataritza eta zerbitzu alorrean euskara erabiltzea. Ohitura dela, ezjakintasuna dela, interes eza dela... oraindik ere denda askotan euskara baztertu eta erdarak baliatzen ditugu, bai bezeroek, baita dendariek ere. Alabaina, egoera horri buelta emateko saioak ez dira gutxi, bai norbanakoen aldetik, bai merkatarien aldetik, bai euskaltzale, euskararen aldeko elkarte edota instituzioen aldetik ere. Bezeroen ahalegin askotan setatsuetatik hasi eta merkatariei orotariko erraztasunak ematen dizkieten instituzioen kanpainetaraino, euskaraz artatu beharrari buruzko ekimenak ugaritzen ari dira Euskal Herrian. Esfortzu handi horri erreparatu diogu guk, bezero, dendari nahiz euskaltzaleek egungo egoera nola bizi duten ezagutu nahian. Eñaut Mitxelena, M. Egimendi.