klikatuz

Ahozkotasunak sarean ere badu bere lekua

Klikatuz - Klikatuz

Astelehena, 2010(e)ko abuztua(r)en 30-(e)an 11:51etan

Euskararen ahozkotasuna ikertzea eta zabaltzea xede duen Mintzola Fundazioak web-gunea ipini du abian. 2009an sortu zuten Mintzola Fundazioa, ahozko tradizioaren behatoki dinamikoa izan eta ahozko komunikazio beharrei erantzuteko asmoz. Atari berriak ahozkotasunaren behatokiari buruzko informazio guztia eskuragarri ipiniko du. Hala, lau atal nagusi ditu guneak: Fundazioaren aurkezpena, Egitasmoak, Dokumentazio egitasmoa eta Aretoen erabilera. Era berean, albistegia ere badu, fundazioaren eta ahozkotasunaren inguruko berriak eta informazioa plazaratzeko. Albistegia e-postaz eta RSS bidez jaso dezakete erabiltzaileek. Sortu berria izaki, oraindik ere hastapen urratsak ematen ari da Mintzola. Ondorioz, web-gune malgua atondu dute, etorkizunean fundazioak garatuko dituen egitasmo berriei ere behar bezalako erantzuna emateko. Ataria www.mintzola.com helbidean topa daiteke.

ELHUYAR Zientzia eta Teknologiaren Hiztegi Entziklopedikoa sarean kontsulta eta erabili daiteke jada. 2009ko urrian liburu eta CD-ROM formatuetan argitaratu ostean, Internetera egin du jauzi zientzia eta teknologiaren arlo guztiak lantzen dituen euskarazko lehen hiztegi entziklopedikoak. Elhuyar Fundazioak eta Euskal Herriko Unibertsitateak Euskadiko Kutxarekin argitaratutako hiztegiak 23.000 kontzepturen definizioak biltzen ditu, dagozkien erdal terminoekin batera. Zehazki, ingelesezko, gaztelaniazko eta frantsesezko terminoak jakinarazten ditu hiztegiak. Horrez gain, irudiak, artikuluak eta lagungarri izan daitezkeen hainbat unitate ere eskaintzen ditu. Zientzia eta teknologiari buruzko 50 alorretako informazioa jasotzen du, bost atal nagusitan banatuta: zientzia zehatzak, materiaren eta energiaren zientziak, Lurraren zientziak, biziaren eta osasunaren zientziak, eta teknologia eta gai orokorrak. Horiek guztiak http://zthiztegia.elhuyar.org web-gunean aurki daitezke.

LABURREAN

Klikatuz - Klikatuz

Astelehena, 2010(e)ko abuztua(r)en 30-(e)an 11:47etan

BATEKMILA-Euskal munduak multimedia erakusketa sarean bisita daiteke, Euskal Kultur Erakundeak 2007an atondutako erakusketa ibiltariaren eduki gehienak Interneten paratu baitituzte. Euskara eta euskal kultura munduan ezagutarazteko sortua, hiru urtez herriz herri mugitu dute. Orain, aldiz, www.euskalmunduak.com atarian dago ikusgai 2008an Unescoren labela eskuratu zuen erakusketa. Lau modulutan banatuta, bideoak, soinuak, argazkiak eta testuak ikusi eta entzuteko aukera eskaintzen du erakusketak bost hizkuntzatan (euskara, frantsesa, gaztelania, ingelesa eta katalana). http://www.batekmila.net/expo.html gunera joanda, zuzenean sartu daiteke bertan.

SOFTWARE libreari buruzko masterra antolatu dute laugarren urtez Euskal Herriko Unibertsitateak (EHU), Udako Euskal Unibertsitateak (UEU) eta Asmoz fundazioak. Aurten, gainera, Euskal Herriko Unibertsitateko Berezko Tituluaren izaera izango du. Software librea: sistema, sarea, segurtasuna eta web aplikazioak ikastaroa 2010eko urriaren 23an hasi eta 2011ko uztailean amaituko da, eta on line izango da, aurrez aurreko saioekin osatuta. Ikastaroan izena emateko epea irailaren 27an amaituko da. Informazio gehiago nahi duenak http://linux.asmoz.org helbidera jo dezake.

Errobotak gure artean

Klikatuz - Klikatuz

Astelehena, 2010(e)ko abuztua(r)en 30-(e)an 11:44etan

Aspalditxo komentatu genuen txoko honetan bertan: gizakion bizi-itxaropena luzatzen doan heinean, gobernu asko hasita daude 20 urte barruko populazio zaharkituari behar bezalako arreta eskaintzeko formula bilatzen. Japonian, esate baterako, uste dute irtenbidea errobotak erabiltzea dela, eta bertako agintariek sekulako aurrekontuak bideratzen dituzte unibertsitateetara pertsonekin aurrez aurre lan egiteko gauza diren errobotak garatu ditzaten. Ikerketa lerroetako batek, gainera, errobot horien itxura ahalik eta atseginena izan dadin lortzea du helburutzat, aitona-amonen laguntzaile jarri nahi dituzten errobotek beldurrik eragin ez dezaten.
Baina giza itxurako errobot edo androide horiek iristen diren bitartean, haien 'arbasoak' sartu zaizkigu etxean eta, konturatu orduko, gutako askok txikitan amesten genuena errealitate bihurtu da: etxeko lanak egiteko errobotak ditugu jadanik, nahiz eta zientzia fikziozko pelikuletan agertzen direnekin zerikusi handirik ez duten.
Adibide argi bat sukaldeko errobotak dira. Izena entzunda, batek pentsa lezake Star Wars filmeko C3PO zuri bat dela, amantal eta guzti. Erroboton benetako itxura, aitzitik, etsigarri samarra da. Finean, irabiagailu eboluzionatuak dira: ontzian, irabiatzeaz gain, jakiak berotu ere egin daitezke, eta hori dena programatu daitekeenez, gehiagorik ez dugu behar sukaldean lanik hartu beharrik ez izateko: sartu osagaiak lapikoan, adierazi makinari osagai horiekin zer egin behar duen, eta sakatu hasteko botoia. Etxera bueltatzen garenerako prest izango dugu bazkaria, bero-bero eta egin berri, gainera!
Azken urtean, berriz, asko famatu dira xurgagailu automatikoak . Hauek ere ez dute oso itxura futuristarik: zoruan handik hona mugitzen den traste borobil zaratatsuak dira. Betiko erratzaren, xurgagailuaren eta errobot baten arteko nahasketa direla esan daiteke: bateria handi bat, xurgagailu txiki bat eta zikina erakartzeko erratz birakari batzuk. Horrez gain, modeloaren arabera, kamera moduko batzuk oztopoak ikusi ahal izateko, eta, hori guztia gidatzen, ordenagailu txiki bat, programazioa eta abarrak gogoratzeko. Botoi bati sakatuta, trastea bera hasten da zorua garbitzen eta, bateria agortzen zaionean, bera bakarrik hurbiltzen da kargagailura, indarra berreskuratzeko. Etxera iristen garenean zikinkeria zakarrontzian hustu eta prest daukagu morroia hurrengo goizean berriz ere hasteko. Oraindik hitz egitea falta zaie, baina, tira, hori denbora kontua da...

Loturak, estekak, linkak...

http://eu.wikipedia.org/wiki/Roomba
Xurgagailu automatikorik ezagunenak Roomba du izena. Euskarazko Wikipedian ere badu artikulu txiki bat.

http://eu.wikipedia.org/wiki/Sukaldeko_errobot
Sukaldeko errobotek ere badute euren txokoa Wikipedian. Kasu honetan, Thermomix izenekoa da ezagunena.

http://www.wowwee.com/en/products/toys/robots/robotics/roboscooper
Xurgagailuaren osagarri ezin hobea: Roboscooper honek zoruan utzitako gauzak atzeman eta bildu egiten ditu. Zapatilak berriz ere ez galtzeko aproposa!